L’assembllée departementale

Depés les voteries du maez de mâ 2015, le Consail jenera pâssit Consail departementa. N-i a 54 consaillous departemantaos elézûs en coupl de deûz (un ome, eune fame), den châqe les 27 cantons qe n-i a den les Côtes d’Ahaot. A l’Assembllée departementale n-i a don ao jou d’anet 27 omes e 27 fames. O mene, o ses berlocheries, les bezaignes du departement. Les consaillous departementaos sont elézûs pour 6 anées de temp.

L’Assembllée departementale s’agroue catr a siz fais su l’an o des assembllées debârées. La permiere assembllée a a-revaer a la Devizerie des Ghideréles du Prizaije. Ole ét den le bout de l’an, olmont l’aprouve e la voterie du Prizaije Permier du Departement q’ét, ben souventes fais, entr les maez de jenvier e de mâ. Durant l’assembllée-la, les grandes permieretës e les ghideréles du Departement sont chouézies par les elézûs. A l’assembllée du maez de jin, les contes sont qenûs e son rezulte ét rempllayë den la pâssée-li. Ét de cai q’a nom la Berlocherie Rarenjante l°1 (BR1/DM1). Ao maez de setembr c’ét l’assembllée d’otone q’a pouint a-revaer, normaoment, ao prizaije meins q’a devocion a fére un më-conte su d’aoqhuns dossouérs. Ao maez de novembr, les elézûs votent eune Berlocherie Rarenjante l°2 (BR2/DM2) qi permet, a l’about, d’alivrer le prizaije pour qe le prizaijement seraet minz d’amain o l’entour a chanjer.

Orinée de l’Assembllée departementale qe tous les souétiérs sont deden, la Consultée Tenante s’agroue, embârée, eune fai su le maez. O decide coment seront donées les aïdes e les survencions parème. O done le dret ao Perzident du Departement de pôzer son sine su des convenants. Ole a les mémes capabletës qe l’Assembllée, pâssë la voterie du Prizaije. Pour dire vif, o mene “les bezaignes du tous-les-jous" du Departement.