Fére de sa béte pour le berton e le galo

Cant q'il ét contance de gârerie qhulturale ét les parlements qi vienent permier ao runje raport qe les parlements-la sont pour un bon bout den le patrimouene de l’ouménetë. La filomie mile-qhulturale s'orine den les parlements-la qi sont le fondement d'un entour qhultura guerzillant. J'ons toute force de les pargarder. N-i a pus de 6000 parlements de caozës den le monde d'anet, qe bétôt la maitië seraet, d'aprés l'UNESCO terjou, pour se mouri avant le bout du siecl-li.

O le dezir de fére de lous béte pour permouver la gârerie des espressions qhulturales, les elézûs departementaos votirent, tout de yun, la permiere politiqe langaijiere du Departement durant la consultée tenante du 10 du maez de mai 2021. L’aguerouée se donit un aberja qi trace le sion pour les anées a viendr, a sour fin de pargarder, d’erdoner e de parchomer le berton e le galo, deûz parlements qe l’UNESCO reqeneût come “vrai su l’en-pére” (vaer l’Atlas UNESCO des parlements su l’en-pére den le monde).

L’aberja-la s’orine d’eune cheminerie d’entr-savair o qhi le Departement paisse deden un amenaijement langaijier. Maintiunes fezantes ont devocion d'erdoner du veghon a la qenéssance e a l’uzaije socia du berton e du galo. Le Departement souète mettr en jiet la parchomance de l’uzaije des parlements de Bertègn den le tous-les-jous e den tous ses demaines. L’aberja-la a citrape d’étr raféçonë e emboni dede o l’entr-savair qe n-i a. I sieut deûz sions estratejiqes :

• Erdoner le parlement

• Véqhi le parlement

Den châqe les sions-la n-i a maintiunes tematiqes o lous defilandée de parchées de fezeries q’ont lous aboutements e lous ensegnouérs de prizaije a yelles.